Хрыстос уваскрос! І падарыў нам новае жыццё

   Святая імша была канцэлебраванай: у ёй удзельнічалі ўсе святары Фарнага касцёла. Па запрашэнню ксяндза-пробашча айца Уладзіміра на літургію прыехалі таксама выкладчык Гродзенскай духоўнай семінарыі ксёндз Ві-таль Сідорка  і ксёндз Алег Канановіч, які вучыцца ў тэалагічным універсітэце ў Любліне.  А ўзначальваў бага-служэнне дапаможны біскуп Гродзенскай дыяцэзіі Юзаф Станеўскі. Ксёндз-біскуп, нягледзячы на хваробу, якую перанёс тыднем раней, спецыяльна прыехаў у Ліду, каб прывітаць і павіншаваць вернікаў лідскіх парафій, а таксама перажыць разам з імі свята Божага Уваскрашэння.

   Падчас імшы ў сваёй прамове айцец Уладзімір звярнуўся да парафіянаў са словамі натхнення. Ён гаварыў аб тым, што, нягледзячы на ўсе турботы, цяжкасці, якія сустракаюцца ў жыцці кожнага чалавека, дзякуючы Хрысту, мы можам дакладна ведаць, што напрыканцы нас чакае не смерць, а новае жыццё. Яго нам падарыў сам Бог, які памёр на крыжы, а затым уваскрос. Таму разам з ім мы ўсё пераадолеем. Хрыстос уваскрос і крочыць з усімі людзьмі і з кожным асабіста па жыцці, каб падтрымліваць, дапамагаць і ратаваць…
   P.S. Пасля імшы вернікі яшчэ доўга не разыходзіліся. Стоячы каля касцёла, яны радасна віталі адзін аднаго і віншавалі са святам. Традыцыйнае: “Хрыстос уваскрос! Сапраўды ўваскрос!” гэтым ранкам чулася адусюль.